Бүгүн 28-июль күнү көк-бөрү федерациясынын баш кеңсесинде Башкармалык кеңешинин жыйыны болуп, алдыдагы Президенттик кубок тууралуу маалымат берилип, талкуу болду. Жыйында көк-бөрү федерациясынын президенти Рамис Жунусалиев, календарлык планга ылайык коюлган президенттин кубогу боло турганын айтып, командаларды активдүү даярданууга чакырды.

Жыйындын жүрүшүндө катышуучу алдыңкы команданын өкүлдөрү акыркы төрт айдан бери Республикалык оюндар токтоп калгандыктан, командага тиешелүү аттар семиз экендигин жүйө келтиришип, турнирдин мөөнөтүн жылдырып турууну өтүнүштү. Дээрлик бардык катышуучулар бул сунушка макулдугун билдирген соң, Башкармалык кеңешинин жыйынында КР Президентинин кубогун 29-август күнү баштап, 6-сентябрда финалдык оюндарды өткөрүү чечимине келишти.

Белгилей кетсек, КР Президентинин кубогу жылыга өтүп келүүчү престиждүү мелдеш. Кубоктун финалдык оюндары 31-август эгемендүүлүк күнүнө карата жыйынтыкталчу. Быйыл жүйөөлүү себептерден улам, турнир мөөнөтү жылдагыдан кеч башталып, кеч аяктайт.

Быйылкы турнир үч лиганын алкагында өтүп, жалпысынан Республика боюнча 30дан ашык команданын катышуусу күтүлүүдө. Турнир Ысык-Көл облусунун Чолпон-Ата шаарындагы ат майданда өтөт.