Кыргызстан көк-бөрү федерациясы оюн эрежелерин өзгөртүү боюнча жумушчу топтун кезектеги жыйынынын өткөрдү. Жумушчу топтун төрагасы, эксперт Рамис Кудайбергенов бүгүнкү 3-августтагы жыйынга алдыңкы командалардын капитандары жана калыстар чакырылгандыгын билдирди. Кудайбергеновдун айтуусунда, эрежени өзгөртүү боюнча жумушчу топ ушул жылдын май айынан бери долбоордун үстүндө иш жүргүзүп келет. Буга чейин Спорттун улуттук түрлөрү боюнча мамлекеттик агенттиктин адистери менен да кеңешүүлөр болгон. Ошондой эле өкмөт өкүлдөрү менен эрежени өзгөртүү жана катаалдаштыруу боюнча талкуулар болуп келди. Бүгүнкү күндө көк-бөрү эрежелерин өзгөртүү боюнча акыркы талкуулар болууда, ушундан улам кезектеги жыйынга Жогорку лигадагы алдыңкы төрт команданын капитандары жана калыстар чакырылып, сунуш-пикирлер айтылды. 

Көк-бөрү федерациясынын эксперти Кудайбергенов, негизги өзгөрүүлөр оюн жүрүшүндө атаандашка карата ат менен койдурууга жаза күчөтүлүп, ошол эле учурда калыстардын дагы жоопкерчилиги чоңоюп жатканын түшүндүрдү. Мындан башка эреже бузган оюнчуну жазалоо үчүн “кызыл карточка” менен калыстардын колдонуу мүмкүнчүлүгү кеңейип жатканын айтып өттү.

Жакынкы күндөрү өзгөртүлгөн эрежелер өкмөт тараптан жактырылган соң, жалпы ММК өкүлдөрүнө маалымат жыйын уюштурулуп, ошондой эле оюнчуларга эрежени жеткирүү үчүн ар бир командага түшүндүрүү иштери жүрмөкчү. Жаңыртылган эрежелер алдыдагы Президенттик кубокто колдонулушу күтүлүүдө.

КР Президентинин кубогу ушул жылдын 29-август күнү башталып, 6-сентябрь күнү жыйынтыктайт. Кубок Чолпон-Ата ат майданында өтөт.