Бүгүн көкбөрү федерациясынын башкармалык мүчөлөрүнүн кезектеги жыйыны болуп, көк-бөрү оюнунун жаңыртылган эрежелери боюнча соңку маалыматтар айтылды. Эрежелерди өзгөртүү боюнча жумушчу топтун төрагасы Рамис Кудайбергенов, долбоордун үсүндө апрель айынан бери иштер тынымсыз жүрүп келгенин, анын алкагында бир нече талкуу жана угуулар болгонун билдирип өттү. Тактап айтсак, эрежени өзгөртүү боюнча топ, өкмөт мүчөлөрү жана спорттун улуттук түрлөрү боюнча мамлекеттик дирекциянын өкүлдөрү менен биргеликте талкууланып, мындан тышкары калыстар жана алдыңкы командалардын капитандарынын сунуш пикирлери эске алынганын билдирди. 

Жалпысынан эрежелер күчөтүлүп жатканын, жаза колдонууга калыстардын укугу кеңейтилип, тартип бузгандарга катаал чаралар кирип жатканын белгиленди. Бүгүнкү жыйындын катышуучулары жаңыртылган эрежелерди колдоо менен алдыда жалпы көк-бөрүчүлөргө кенен түшүндүрүү иштери жүргүзүлө турган болду.

Көк-бөрү федерациянын президенти Рамис Жунусалиев эрежени өзгөртүү боюнча жумушчу топтун өкүлдөрүнө терең ыраазычылыгын билдирүү менен 30-август күнү Чолпон-Ата шаарында Көк-бөрү федерациянын кезектеги курултайын өткөрүү сунушун киргизди. Курултайга жалпы көк-бөрүчүлөр чакырылып, жыйында өзгөртүлгөн эрежелер боюнча толук маалымат берүү демилгеси жалпы катышуучулар тарабынан колдоого алынды. Курултайдын соңунда 31-август күнү башталчу КР Президентинин кубогунун чүчү кулагы да өтмөкчү.

Белгилей кетсек, КР Президентинин кубогу ушул жылдын 31-август күнү башталып, 7-сентябрда жыйынтыкталат. Турнирге Республика боюнча жыйырмадан ашык команданын катышуусу күтүлүүдө.